O XIII Proxecto Didáctico Antonio Fraguas premiará a investigación escolar arredor do patrimonio lingüístico e cultural galego

O XIII Proxecto Didáctico Antonio Fraguas premiará a investigación escolar arredor do patrimonio lingüístico e cultural galego

3 Abril, 2024

A décimo terceira edición deste proxecto, organizado polo Museo do Pobo Galego co patrocinio da Xunta de Galicia, presentouse hoxe en Santiago.

Manuel Vilar, Valentín García, Concha Losada e Bieito Pérez Outeiriño, na presentación do proxecto.
Manuel Vilar, Valentín García, Concha Losada e Bieito Pérez Outeiriño, na presentación do proxecto.

A XIII edición do Proxecto Didáctico Antonio Fraguas Fraguas porá en valor as pescudas sobre o patrimonio etnográfico, antropolóxico, lingüístico, xeográfico, histórico e artístico desenvolvidas no marco dos centros de ensino galegos. Así o anunciaron este mediodía o secretario xeral de Política Lingüística da Xunta de Galicia, Valentín García; a presidenta da Fundación Antonio Fraguas Fraguas, Concha Losada; o coordinador do proxecto, Bieito Pérez Outeiriño; e o director do Museo do Pobo Galego, Manuel Vilar, na rolda de prensa na que deron a coñecer os detalles da nova convocatoria desta iniciativa.

Trátase dunha “aposta por achegar a comunidade escolar ao medio e á cultura galegas”, en palabras de Concha Losada, quen animou a profesorado e rapazada a participar neste proxecto que “pon en valor e visibiliza o patrimonio material e inmaterial galegos así como a lingua propia de Galicia, que se abordará a través da toponimia, a antroponimia ou a fraseoloxía”, tal e como apuntou Valentín García.

Segundo engadiu o coordinador do proxecto, Bieito Pérez Outeiriño, nas últimas convocatorias xa se fixeron “traballos moi interesantes tanto por parte do profesorado como dos e das alumnas, que aprenden a coñecer o patrimonio desde o sentido máis amplo e desde as idades máis temperás”.

Prazo e bases de participación

O Proxecto Didáctico Antonio Fraguas Fraguas, promovido desde 2004 pola fundación do mesmo nome e apoiado pola Xunta de Galicia a través da Secretaría Xeral de Política Lingüística, inclúe dúas modalidades de participación (ensino primario e secundario) dotadas, cada unha delas, con 7.000 euros destinados á materialización dos proxectos gañadores durante o vindeiro curso escolar 2024-2025. Os traballos resultantes serán expostos no Museo do Pobo Galego no derradeiro trimestre de 2025.

O prazo de participación estará aberto ata o 1 de xuño e o xurado emitirá o seu ditame antes do 22 dese mes.

O ámbito temático dos proxectos abranguerá un ou varios destes campos: etnografía, antropoloxía, xeografía, historia ou arte da contorna inmediata do centro e un capítulo, ou a liña de traballo, dedicarase a abordar algún aspecto lingüístico relacionado co tema proposto. Ademais, valoraranse as accións que fomenten a educación en igualdade e o coñecemento do patrimonio material e inmaterial relacionado cos camiños de Santiago.

Na convocatoria anterior fixéronse cos galardóns o CEIP Plurilingüe da Ramallosa (Teo), co proxecto “Ecoparloteo, froitos da terra“; e o IES do Milladoiro (Ames) xunto co IES Marco do Camballón (Vila de Cruces), polo proxecto conxunto “Ao son da oralidade. O noso patrimonio. Da pedra á palabra. Da prehistoria ao século XXI“.

 

Exposición XII Proxecto Didáctico Antonio Fraguas

Exposición XII Proxecto Didáctico Antonio Fraguas

18 Decembro, 2023

Dende o 4 de novembro e ata comezos de xaneiro, o claustro alto do Museo acolle a exposición dos traballos premiados na XII edición do Proxecto Didáctico Antonio Fraguas Fraguas. Un proxecto que procura lembrar a figura do eminente pedagogo que fora primeiro director deste Museo do Pobo Galego, premiando a comunidade escolar polos seus esforzos cara á educación patrimonial, ao coñecemento da lingua e do medio e á valoración dos máis diversos elementos do noso acervo cultural, a través de traballos sistemáticos de pescuda sobre o patrimonio etnográfico, antropolóxico, lingüístico, xeográfico, histórico e artístico da contorna dos centros escolares.

Os proxectos gañadores desta edición son Ecoparloteo, froitos da terra, do CEIP Plurilíngüe da Ramallosa (Teo), na modalidade de ensino primario; e o proxecto Ao son da oralidade. O noso patrimonio. Da pedra á palabra. Da prehistoria ao século XXI, presentado conxuntamente polo IES do Milladoiro (Ames) e o IES Marco do Camballón (Vila de Cruces), na modalidade de ensino secundario.

O proxecto desenvolvido polo colexio teense da Ramallosa, Ecoparloteo, froitos da terra, amosa unha mestura de elementos do noso patrimonio material e inmaterial, como os Entroidos de Galicia, o patrimonio oral, a toponimia, o proxecto “Cóntame un conto” impulsado pola Fundación Antonio Fraguas Fraguas ou a radio escolar.

 

Pola súa banda, o traballo da comunidade escolar dos institutos do Milladoiro e de Vila de Cruces xira arredor de tres eixos temáticos do patrimonio material e inmaterial: os petróglifos, a toponimia e a improvisación oral en verso. Na exposición pódese interatuar -a través de códigos QR, xogos interactivos, fontes audiovisuais e outras adaptacións ás novas tecnoloxías- con contidos como os petróglifos, a toponimia, a relación da música tradicional coa contemporánea, a regueifa, a oralidade no entroido do Ulla ou unha mostra do Proxecto Regueifesta, impulsor da improvisación oral en verso desde os dous centros recoñecidos co Premio Antonio Fraguas.

 

 

O Proxecto Didáctico Antonio Fraguas Fraguas conta co patrocinio da Secretaría Xeral de Política Lingüística da Xunta de Galicia e está integrado no Plan Proxecta+ para fomentar a innovación educativa da Consellería de Cultura, Educación, Formacion Profesional e Universidades.