A exposición que podedes visitar grazas á colaboración do Concello de Cerdedo‐Cotobade, membro do Padroado da Fundación Antonio Fraguas Fraguas, xurdeu en plena pandemia, cando estabamos confinados cada quen coa súa unidade familiar para conter o virus SAR19.
Despois de inzarmos Galicia de numerosas actividades homenaxeando a figura e aobra de Antonio de Insuela no 2019, no que foi homenaxeado no Día das Letras Galegas, as restricións sanitarias do seguinte ano cortaron o plan de traballo aprobadona Fundación Antonio Fraguas Fraguas.
Coa xente confinada no 2020, fumos quen de ver como os animais saían e reocupaban espazos dos que foran expulsados, e grazas ao traballo de Miguelanxo Prado tamén ocuparon, na súa versión ilustrada, o seu lugar en librarías, bibliotecas e fogares.
Catalogando o arquivo de Antonio Fraguas, depositado e custodiado xunto coa súa biblioteca no Museo do Pobo Galego, a patroa do Museo, Rosa Méndez García, atopou un conxunto de follas manuscritas inéditas que describían algunhas crenzas populares arredor de distintos animais. O Museo do Pobo Galego e a Fundación Antonio Fraguas Fraguas acordaron publicalas co apoio da Secretaría Xeral de Política Lingüística da Xunta de Galicia.
Dende o comezo visualizamos a edición como un libro ilustrado, que enriquecese un proxecto non rematado polo autor. Tivemos a sorte de que Kiko da Silva, gran ilustrador e editor especializado neste xénero, se sumase ao proxecto como editor artístico, e mesmo foi quen deu nome a un proxecto que carecía de título.
Alén do mérito do seu traballo, foi quen de incorporar a Miguelanxo Prado, debuxante e ilustrador de prestixio, recoñecido con numerosos galardóns pola súa obra. Cos seus deseños estableceu un diálogo entre a ilustración e a o texto de Antonio Fraguas.
Os deseños que hoxe podedes ver nesta exposición son proba da seu bo facer, e do cariño co que acolleu o noso proxecto, agasallándonos con 26 pequenas obras de arte.
Aproveitade esta oportunidade para ver e rever os animais de Miguelanxo, axudádenos a dar a coñecer esta exposición entre as vosas amizades e, se queredes levar os animais á vosa casa, comprade o libro “Os animais de Fraguas” na vosa libraría de confianza. Ou se o preferides, visitade en Compostela o Museo do Pobo Galego, onde tras percorrer as súas salas poderedes adquirir un exemplar á saída.
Fuco Sanjiao Otero
Secretario da Fundación Antonio Fraguas Fraguas
Cerdedo‐Cotobade, xaneiro de 2024

O proxecto Viva o entroido vivo! Lingua, festa e comunidade, presentado conxuntamente polo CEIP Lamas de Abade, o CEIP Apóstolo Santiago (Santiago de Compostela) e o CEIP Pérez Viondi (A Estrada) na categoría de ensino primario, e o proxecto A sustentabilidade das artes de pesca a través do proceso de encascado de redes: o caso de Burela, do IES Monte Castelo (Burela) na categoría de ensino secundario, son os gañadores na XIII edición dos premios Antonio Fraguas Fraguas.
O Proxecto Didáctico Antonio Fraguas Fraguas, promovido desde 2004 pola fundación homónima e patrocinado pola Xunta de Galicia a través da Secretaría Xeral de Política Lingüística, pretende poñer en valor as pescudas sobre o patrimonio etnográfico,antropolóxico, lingüístico, xeográfico, histórico e artístico desenvolvidas no marco dos centros de ensino galegos.
No caso do proxecto Viva o entroido vivo! Lingua, festa e comunidade, o xurado valorou a incorporación de todos os centros escolares dos distintos niveis educativos da contorna e o traballo desenvolvido durante máis dunha década na representación das distintas manifestacións etnográficas e culturais do Entroido, así como a presenza das mulleres en actividades nas que até agora estaban infrarrepresentadas, como os altos, vivas e atranques.
Na modalidade de ensino secundario, o proxecto A sustentabilidade das artes de pesca a través do proceso de encascado de redes: o caso de Burela, do IES Monte Castelo, foi elixido gañador tamén por unanimidade. O xurado destacou del o feito de que afonde nunha actividade e nun oficio hoxe desaparecidos, coa importancia que supón á hora de conservar a súa memoria para o coñecemento das novas xeracións. Así mesmo, valorou a implicación social do proxecto na súa contorna e a colaboración con entidades doutros territorios de Europa onde tamén se desenvolveu esta actividade.

O premio Antonio Fraguas Fraguas está dotado en cadansúa modalidade con 7.000 euros destinados á materialización dos proxectos gañadores durante o vindeiro curso escolar 2024-2025. Os traballos resultantes serán expostos no Museo do Pobo Galego no derradeiro trimestre de 2025

Descarga nota de prensa